मोरगाव- मयुरेश्वराची भाद्रपदी यात्रा रद्द
मोरगाव : अष्टविनायक तीर्थक्षेत्र मोरगाव ता.बारामती येथील भाद्रपद यात्रा उत्सव कोरोना या विषाणूजन्य आजाराच्या वाढत्या फैलावामुळे संपन्न होणार नाही . तसेच मयुरेश्वर मंदिर बंद असल्याने यात्रा काळात भाविकांना मुक्त दर्शनाचा लाभ घेता येणार नसून केवळ धार्मिक पूजाअर्चा होणार असल्याची माहिती विश्वस्त चिंचवड देवस्थान ट्रस्टचे विश्वस्त विनोद पवार यांनी दिली .
मोरगांव येथील भाद्रपद यात्रा उत्सव भाद्रपद शुद्ध प्रतीपदा दिनांक १९ ते भाद्रपद शुद्ध पंचमी दिनांक २३ या तारखेस आला आहे . यात्रा काळात दरवर्षी सर्व धर्मीयांना मुक्तद्वार दर्शनाच्या निमित्ताने श्रींचा मुख्य गाभारा खुला करण्यात येतो .यानिमित्ताने श्रींना जलस्नान घालण्याची पर्वणी साधता येते . मात्र कोरोना या विषाणूजन्य आजाराच्या वाढत्या फैलावामुळे मयुरेश्वर मंदिर बंद आहे. राज्य शासनाच्यावतीने मंदिर उघडण्याबाबतचे अद्याप पर्यंत कुठलेही अध्यादेश दिलेले नाही .
यात्रा काळ जरी असला तरी मंदीर व मुक्तद्वार दर्शन बंद असल्याने भाविक भक्तांनी मोरगाव येथे दर्शनासाठी न येण्याचे आव्हान चिंचवड देवस्थान ट्रस्टच्या वतीने करण्यात येत आहे. कोरोनामुळे चिंचवड येथून येणारा महासाधु मोरया गोसावीप्राप्त मंगलमुर्ती पालखी सोहळा यंदा गाडीतुन केवळ दहा लोकांच्या उपस्थितीत येणार आहे . तसेच दरसाला प्रमाणे मंगलमुर्तीची गावातुन रात्री होणारी मिरवणूक रद्द केलेली आहे. त्याचप्रमाणे मयुरेश्वरास या वर्षी सुवर्णालंकार युक्त पोशाख चढविला जाणार नसून नेहमीचेच पोशाख चढविले जाणार आहेत .
मात्र परंपरेने चालत आलेल्या धार्मिक पूजाअर्चा होणार आहे . कोरोनाची वाढती संख्या लक्षात घेता भाविकांनी कळस दर्शन , पायरी दर्शन अथवा मुखदर्शन या कुठल्याच निमित्ताने मयुरेश्वर मंदिराच्या परिसरात येऊ नये असे आवाहन विश्वस्त पवार यांनी केले आहे.
