दर्शनाला आलेल्या २ चोरट्यांनी होळच्या ढगाई देवी मंदिरातील दानपेटी केली लंपास

वडगांव निंबाळकर - बारामती तालुक्यातील होळ येथील प्रसिद्ध असलेल्या ढगाई देवी मंदिरातील दानपेटीवर अज्ञात चोरट्यांनी डल्ला मारल्याची घटना सोमवारी (दि. २१) सकाळी उघडकीस आली.

           चोरट्यांनी दानपेटीवर डल्ला मारण्यापूर्वी देवीचे दर्शन घेतले असल्याचे सीसीटीव्ही कॅमेऱ्यात कैद झाले आहे.

       होळ येथे निरा नदीकाठी हे मंदिर आहे. रविवारी (दि. २०) सायंकाळी पूजा-आरती आटोपून येथील पुजारी घरी गेले. सोमवारी सकाळी ते दैनंदिन पूजेसाठी गेले असताना गाभाऱ्याच्या दरवाजाचे कुलुप तुटलेल्या अवस्थेत दिसून आले. आतील मंदिरातील दानपेटी जागेवर नसल्याचे दिसून आले. त्यांनी तात्काळ ग्रामस्थांना माहिती दिली. वडगाव निंबाळकर पोलिस ठाण्याला खबर देण्यात आली. मंदिरातील सीसीटीव्ही यंत्रणा असून यामध्ये दोघे चोरटे दानपेटी घेऊन जाताना दिसत आहेत.

        वडगाव निंबाळकर पोलिसांनी सीसीटीव्ही कॅमेऱ्याच्या आधारे चोरट्यांचा शोध सुरु केला आहे.